കാത്തിരിപ്പിന് പാതിയില്,
പ്രണയം രാകി കൂര്പ്പിച്ച
ഒരു നോട്ടം
അതീവ ജാഗ്രതയോടെ
നീ എറിഞ്ഞു തരുന്നു
അത് ഹൃദയത്തിന്റെ
ആഴങ്ങള് താണ്ടി.
മൌനത്തിനൊടുക്കം -
"നിന്റെ ഒരൊറ്റ നോട്ടം മതി
എനിക്ക് പെണ്ണാകാന് "
നിന്റെ മൊഴി !
വാക്കിന് കയങ്ങളില്
വീണു;പിന്നെ നമ്മള്.
എന്നെ ഉന്മാദിയാക്കുന്ന
ഒരു ഗന്ധം നിന്നില് നിന്ന്
പുറപ്പെടുന്നു,
അത് എന്റെ നാസാദ്വാരങ്ങളെ
കോരിത്തരിപ്പിച്ചു
കടന്നു പോകുന്നു
ഇതാണ് എന്റെ ഒടുക്കം
ഇവിടെയാണ് എനിക്ക് ബലി
നീ യാത്ര പറഞ്ഞ് ,
പിന്തിരിഞ്ഞു നോക്കാതെ
അകലേയ്ക്കു മായുന്നു
എന്റെ കവിത
കടല് കൊണ്ട് പോകുന്നു.
പ്രിയേ,
എനിക്ക് മുനയൊടിഞ്ഞ
മൌനം സമ്മാനിക്കുക
വിരഹത്താല് എന്നെ
ഭ്രാന്തനാക്കുക
No comments:
Post a Comment