മിനാ ! (ഡ്രാക്കുള പ്രഭുവിന് )

പ്രണയാതുരമായി,മിനാ 
നിന്നിലേയ്ക്ക് 

പിന്നെയും
വലിച്ചിഴയ്ക്കപ്പെടുകയാണ്
ഞാന്‍.
രക്ത ദാഹിയെന്ന്
മുദ്രകുത്തപ്പെട്ട,
ഭഗ്ന പ്രണയത്തിന്‍റെ
പ്രാക്തന ജീവന്‍;ഡ്രാക്കുള

ഈ കൊട്ടാരത്തിന്‍റെ
ചുവരുകള്‍ക്കുള്ളില്‍
ഇന്നും പൂക്കുന്ന
നമ്മുടെ പ്രണയം

നടക്കാവുകള്‍ക്കരുകില്‍
നിനക്കായി ഞാന്‍ നട്ട
പനിനീര്‍ച്ചെടികള്‍
ഇനിയും വാടിയിട്ടില്ല

നിന്‍റെ തപ്ത നിശ്വാസം
കുമിഞ്ഞു നില്‍ക്കുന്ന
നമ്മുടെ പൂമെത്ത

മരണത്തിലേയ്ക്ക്
സ്വതന്ത്രനാക്കാതെ
നീ എന്നെത്തളച്ചിടുന്ന
പ്രണയാഗ്നിതന്‍
കല്‍ത്തുറുങ്ക്

എന്റെതിനേക്കാള്‍
മൂര്‍ച്ച യുള്ള
നോട്ടമാണ്
നീയെനിക്ക്
എറിഞ്ഞു തന്നത്
ഇന്ന്, ഞാന്‍ നിന്നിലെയ്കെത്താന്‍
താണ്ടുകയാണീ
ചരല്‍പ്പാതകള്‍
ഘനനീലവനങ്ങള്‍
നീലത്തടാകങ്ങള്‍
ഭീതി തന്‍
കോട്ടകൊത്തളങ്ങള്‍ !

എന്‍റെ കൃഷ്ണമണികളില്‍
നൃത്തം ചെയ്യും
നിന്‍റെ പ്രണയത്തില്‍
കന്യാ വനങ്ങള്‍

ഹാ ! ഇതാ ഞാന്‍
ഈ കല്ലറത്തണുപ്പിനു
മുകളില്‍
നിന്നെ
വിവസ്ത്രയാക്കുന്നു
നിന്‍റെ ജ്വലന സൌഭഗം
നിലാവു ചുരത്തും രാത്രി !

എന്നെ ഉലച്ചുകളയുന്ന
കാമന;നിന്നോടിണ ചേരുവാന്‍
ഞാന്‍ നിന്നിലെയ്ക്ക് വരുന്നു
വെളുത്തുള്ളിയുടെ
ഗന്ധം പരക്കും രാത്രിയില്‍
ചെന്നായ്ക്കളും
കടവാതിലുകളും
കാവല്‍ നില്‍ക്കെ
എന്‍റെ പ്രിയേ
മിനാ,
എന്റേത് മാത്രമാവുക!

ഗൌരിയ്ക്ക് !

ഞങ്ങളുടെ ഗൌരിയായിരുന്നു. 
എപ്പോഴും ചിരിച്ച മുഖമായിരുന്നു.

കടലിലെ ലവണം പഞ്ചസാരയാണെന്നു
പറഞ്ഞ്, 
ടീച്ചറെ കളിയാക്കി,
സ്കൂള്‍ വിട്ടു പോരുമ്പോള്‍
അവന്‍  
നാലാം ക്ലാസില്‍ ആയിരുന്നു. 

പിന്നീട്,
പ്രവാസത്തിനിടയില്‍ 
കളിചിരികള്‍ കൊണ്ട് 
കൊടും വെയില്‍ വറ്റിച്ചിരുന്നവന്‍.

പേരില്‍ മാത്രമേ സ്ത്രൈണത 
ഉണ്ടായിരുന്നുള്ളൂ.

പല്ലുകാട്ടി , ശബ്ദമുണ്ടാക്കി 
തുറന്നു ചിരിക്കാന്‍ 
ഞങ്ങളെ പഠിപ്പിച്ചിരുന്നവന്‍ 

ഇന്ന്, ഞങ്ങളെയും 
ഈ ലോകത്തെയും 
വിട്ടു പോകുമ്പോള്‍ 
അവന്റെ പേര് 
ഗൌരി ശങ്കര്‍ ആയിരുന്നുവെന്ന് 
ഞാനോര്‍ക്കുന്നു,
ഉള്‍ക്കിടിലത്തോടെ ! 

അവന്‍ 
നല്ല ഒരു ആണ്‍കുട്ടിയായിരുന്നു !

അവന്റെ മരണവാര്‍ത്തയും 
കൊണ്ട് വന്ന ഒരു ഫോണ്‍ സന്ദേശം 
ഇപ്പോഴും എന്‍റെ ചെവികളെ 
മലിനമാക്കിക്കൊണ്ടിരിക്കുന്നു  ! 

അത് മനസ്സിനെ 
വല്ലാതെ  
ഉലച്ചു കൊണ്ടേയിരിക്കുന്നു 
അവന്‍റെയാത്മാവ് 
ചിറകു വിരിച്ച് 
എനിക്കൊപ്പം പറക്കുന്നു !! 

അവള്‍ പെണ്ണാകുന്നത് !

കാത്തിരിപ്പിന്‍ പാതിയില്‍,

പ്രണയം രാകി കൂര്‍പ്പിച്ച

ഒരു നോട്ടം 

അതീവ ജാഗ്രതയോടെ 

നീ എറിഞ്ഞു തരുന്നു

അത് ഹൃദയത്തിന്റെ

ആഴങ്ങള്‍ താണ്ടി.

മൌനത്തിനൊടുക്കം - 

"നിന്‍റെ ഒരൊറ്റ നോട്ടം മതി

എനിക്ക് പെണ്ണാകാന്‍ " 

നിന്റെ മൊഴി ! 

വാക്കിന്‍ കയങ്ങളില്‍

വീണു;പിന്നെ നമ്മള്‍.

എന്നെ ഉന്മാദിയാക്കുന്ന

ഒരു ഗന്ധം നിന്നില്‍ നിന്ന്

പുറപ്പെടുന്നു,

അത് എന്‍റെ നാസാദ്വാരങ്ങളെ

കോരിത്തരിപ്പിച്ചു 

കടന്നു പോകുന്നു 

ഇതാണ് എന്‍റെ ഒടുക്കം

ഇവിടെയാണ്‌ എനിക്ക് ബലി 

നീ യാത്ര പറഞ്ഞ് ,

പിന്തിരിഞ്ഞു നോക്കാതെ

അകലേയ്ക്കു മായുന്നു

എന്റെ കവിത 

കടല്‍ കൊണ്ട് പോകുന്നു.

പ്രിയേ,

എനിക്ക് മുനയൊടിഞ്ഞ

മൌനം സമ്മാനിക്കുക

വിരഹത്താല്‍ എന്നെ

ഭ്രാന്തനാക്കുക

പ്രണയം

ചിലപ്പോഴെല്ലാം, 
ഒരു വാക്കിനിരു പുറങ്ങളില്‍ 
നീയും ഞാനും ! 
ഒന്നുമുരിയാടാനാവാതെ, 
നിശബ്ദമായി 
എന്‍റെ പ്രണയം 
ഈ തടാകത്തിന്‍ കരയില്‍ 
ഞാന്‍ വയ്ക്കുന്നു; 
കാലൊച്ച കേള്‍പ്പിക്കാതെ 
ആരാരും കാണാതെ, 

വന്നു പതിയെ അതെടുത്ത് കൊള്‍ക
എന്‍റെ പ്രിയേ,
എന്‍റെ മൃദുലമാം
പ്രണയം പുതച്ച്
ഉറങ്ങുക !!

യാതനാ (പ്രണയ ) പര്‍വ്വം !

ഇതാ , ഞാന്‍ 
പുഷ്പകിരീടം ചൂടി,
നിന്നെയോര്‍ത്തു പാടുന്ന 
നിന്‍റെ ഗന്ധര്‍വന്‍ 

പാതയരുകില്‍‍,പൂത്ത
മരത്തണലില്‍
ഇരുന്നു ഞാന്‍
എന്‍റെ ദിവ്യമാം പ്രേമം
നിനക്കു തരും

ഹാ!
എന്നിലേയ്ക്ക് നോക്കുക
പ്രണയ ജ്വരം
തീയായ് പൂക്കുന്ന
നിന്‍റെ കണ്ണുകളില്‍
നിന്ന് ഞാന്‍
നിത്യ പ്രേമത്തിന്റെ
താപമേറ്റു വാങ്ങും

ഇതാണു
ഞാന്‍ ചെയ്തത്
നിന്നെ
നിശബ്ധമായും,
അന്ധമായും
നിന്നെ
അസ്ഥിയോളം
പ്രണയിക്കുക മാത്രം

യാതനാ പര്‍വ്വം !
എനിക്ക്
സ്വര്‍ഗ്ഗവും നരകവും
നിഷേധിക്കപ്പെടുമ്പോള്‍
ഇന്നീ ഭൂമിയിലിരുന്നു
നിന്നെയോര്‍ത്തു പാടാന്‍
ഒരു പൂന്തോട്ടം ഒരുക്കുക

ഒരു ചുംബനത്തിന്‍
അഗാധതയില്‍
നമുക്ക്
വിശുദ്ധരാവുക

എനിക്കായി
ഇതാ ഒരു ചാട്ടവാര്‍
അഗ്നിസര്‍പ്പ ദംശനം
വിഷം കലര്‍ത്തിയ
ഒരു കോപ്പ വീഞ്ഞ്

ഗന്ധകം കൊണ്ട്
പുകഞ്ഞു പോകുന്ന
എന്‍റെ കണ്ണുകള്‍

ഇപ്പോഴിതാ
അന്ധതയിലും
എന്നില്‍ നീ പൂക്കുന്നു

കയ്ച്ച കവിത

അതെ ,
ഇന്ന് സ്വാതന്ത്യ ദിനത്തില്‍, 
അന്നമില്ലാതലയുന്ന 
കുട്ടികളുടെ 
കരളു പൊള്ളിയ്ക്കും 
വിലാപം കേട്ട്,
സ്വാന്ത്വനത്തിന്‍ കണിക പോലും 
വച്ചു നീട്ടാനാവാതെ, 
മടുത്ത്, 

വേച്ചു വേച്ച് ഞാന്‍
ശ്മശാനത്തില്‍
അന്തിയുറങ്ങാന്‍ പോകുന്നു.

ആധുനികോത്തര
നര ജന്മമാണ് ഞാന്‍
കരുണയോ ഏങ്ങലോ
ഇല്ലാതെ
എനിക്ക്
ഉറക്കം വരുവോളം
ഇന്ന്
സാത്താനുമായി സല്ലപിക്കണം.

നല്ല നാളെയ്ക്കായി
മാലാഖമാര്‍
സമാധാനത്തിന്റെ
വെള്ള തുണി നെയ്യുന്നത്
കത്തിച്ചു കളയാന്‍
ഞാന്‍
സാത്താനുമായി
ഇന്ന് ഒരു ഉടമ്പടി ഒപ്പ് വയ്ക്കും

കയ്പിന്റെ വെള്ളം കുടിച്ച്
എന്‍റെ ദൈവപുത്രന്‍
മരിയ്ക്കുന്നത് കണ്ട്

ഞാന്‍ ഉന്മാദം ചിരിയ്ക്കും.

 പിന്നെ,
ചുണ്ടിലൂടെ 

കിനിഞ്ഞിറങ്ങിയ 
കയ്ച്ച കവിതയെ-
പ്പുണര്‍ന്ന് , 
അകന്നു പോകുന്ന 
സ്വാതന്ത്ര്യത്തിന്റെ 
പത്തേമാരി നോക്കി 
മണല്‍ ത്തിട്ടയില്‍ 
കിടന്നു ഞാനുറങ്ങും
ശുഭരാത്രി !! 

ബന്ധം

1.
ഒരു വിവാഹം കഴിച്ചു
മടുത്തു
വിരാമത്തിനു ഒരു
കുറിമാനം അയക്കണം !

2.
പറിച്ചെറിഞ്ഞ താലി
ഇന്ന് നോക്കുമ്പോള്‍ ക്ലാവ് !
ചെമ്പ് പൂശിയ ഹേമമാം ജീവിതം .

3.
കുരിശു വരക്കാതെ
അത്താഴമുന്ണാനിരുന്നു
ചോറില്‍ കല്ലുകടിച്ചെഴുന്നേറ്റു !

4.
മെത്ത ഒഴിവാക്കി
ഇന്ന് പത്തു പതുപതുപ്പില്ലാതെ
കിടക്കണം പലകമേല്‍ !

5.
വീട്ടില്‍ നിന്നിറങ്ങി
ആകെ വൃത്തികേടാക്കി പോലും
വയ്യ - തിരികെ കേറാന്‍

നദികളുടെ രാജകുമാരി

നദികളുടെ രാജകുമാരി

പൊന്നുടുമ്പ്‌ പോല്‍
ഇഴയുന്നു
രാത്രി സംഗീതം !
... നിശയുടെ കുഞ്ഞുങ്ങള്‍ ഉറങ്ങിയിട്ടില്ല

*മിനാ,
അമൂര്‍ത്ത പ്രേമത്തിന്റെ സുന്ദരീ ,
ചോര പൊടിഞ്ഞ കുരിശിനരുകില്‍ ഞാന്‍
ഒര് നോട്ടത്തിന്‍ മുന കൊണ്ട്
എനിക്ക് നിന്നെ പിടിച്ചു നിര്‍ത്താം
നിന്‍റെ കണ്ണു നീര്‍ ത്തുള്ളിയെ
വൈഡൂര്യമാക്കി ഞാന്‍ നിനക്ക് തരും.

ഒര് ചുംബനത്താല്‍
ഞാന്‍ നിന്നേ ബന്ധിക്കുന്നു
കൂര്‍ത്ത ഒരാലിംഗനത്താല്‍
നീയെന്റെതാവും
എന്‍റെ കണ്ണു കളിലൂടെ
ദൂരെ മുന്തിരിപ്പാടങ്ങള്‍ കാണുന്ന നീ !

കലരുന്നു നമ്മുടെ ചോരതന്‍ നദി
എന്‍റെ കണ്ണുകളില്‍
ഇരമ്പുകയാണ്
രക്തത്തിന്‍ കടലുകള്‍
ഞാന്‍ പഠിക്കുന്നത്
ഹിംസ്ര ജന്തുക്കളുടെ പാഠങ്ങള്‍
ആര്‍ത്തലയ്ക്കുന്ന വിലാപം.

നിന്‍റെ പിന്‍കഴുത്തില്‍
ദംഷ്ട്രകള്‍ ആഴ്ത്ത്മ്പോള്‍
ഞാനറിയുന്നത് എന്താണെന്നല്ലേ ?
നീ കണ്ണീര്‍ നിറഞ്ഞ ഒര് നദിയായിരുന്നു
അതെ **ആര്‍ഗെസ് പോലെ
സുന്ദരിയായ
ഒര് രാജകുമാരി !

* Mina - Charecter from Bramstoker's Drakula
** Arges - There was a princess. She was the most radiant woman in all the empires of the world. But man's deceit took her from her ancient prince. She leapt to her death into the river. From then it is called Argeş - River Princess

ചിത്രം കടപ്പാട് - http://megatherionus.deviantart.com/

തിരികെ !

ഇന്നലെ മുഴുവന്‍ പനിച്ചു കിടന്നു
ജ്വരം തിന്ന ഒരു തലച്ചോറ്
പുതയ്ക്കാന്‍ കംബിളിയില്ലാതെ
നിന്റെ ഗന്ധമില്ലാതെ
കാലുകള്‍ക്കും കയ്യുകള്‍ക്കും
ചലനശേഷിയില്ലാതെ
നിവര്‍ന്നു നിര്‍ജീവം കിടക്കുമ്പോള്‍
ഓര്‍മയില്‍ അരുകിലിരുന്നു
ആത്മാവിന്റെ പുസ്തകം
വായിക്കുന്നത് ആരാണ് ?
ചോരച്ചുമ പൊന്തും കണ്ഠത്തില്‍
സ്നേഹത്തിന്റെ തൈലമിറ്റിച്ചതാരാണ് ?
വെള്ളരിപ്പൂംപ്രാവായി വന്നു
നിലാവിന്റെ ഗാനം കുറുകിയതാരാണ് ?
അവ്യക്തമായ ഓര്‍മകള്‍ക്കുമേല്‍
ഒരു ഹിംസ്ര മൃഗത്തിന്‍ രശനയില്‍ നിന്നും
നിണം തൂകി എന്റെ സ്വപ്നത്തെ
ചുവപ്പിച്ചു , ഒടുവില്‍
രക്തപങ്കിലം എന്റെ ദേഹിയെ
ഒരു തെമ്മാടിക്കുഴിയിലേക്ക്
വലിച്ചെറിഞ്ഞതെന്തിനാണ് ?
എനിക്ക് ജീവനില്‍ വലിയ കൊതിയാണ്
നിനക്ക് മുന്നില്‍ പറക്കാന്‍ ,
ഒരു വഴികാട്ടിയായി !
ഈ പനി ഒന്ന് മാറട്ടെ,
അത് വരെ ഒന്ന് ക്ഷമിക്കൂ
ഞാന്‍ എന്റെ ഓര്‍മകളിലേക്ക് തരിച്ചു വരും
അത് വരെ അതുവരെ മാത്രം !

മൈക്കേല്‍ ജാക്സനൊരു ഗീതം

ആരുനോവിച്ചിതെന്നാത്മാവിനെ ?
ചോദിച്ചു നീ; ഉത്തരം കാക്കാതെ
പൊലിഞ്ഞ സ്നേഹമേ പ്രണാമം.

നിന്റെയുള്ളില്‍
വേദന വിങ്ങി നിന്നു പാട്ടുകള്‍,
രുദ്രം താളം!

ചെകുത്താന്റെ പാട്ടുകളെന്നു
മുദ്രകുത്തപ്പെടുമ്പോള്‍
അഭയം കണ്ടു
നിന്‍റെ യൌവ്വനം
മോര്‍ഫീന്‍ കയങ്ങളില്‍ !

വേദന മറന്നു
നീ പാടുന്ന
ഡാമറോള്‍
പ്രഭാതങ്ങള്‍

പാട്ടിന്‍ കയങ്ങളില്‍
ആയിരങ്ങള്‍ തുള്ളി മറിയുന്ന
നിശകള്‍

ദിനങ്ങളൊടുങ്ങുന്നു .

നഷ്ട്ടപ്പെട്ടുപോയ
കാതരയാം നിന്‍
സ്നേഹിതയുടെ
ഒര് ലേഖനം കൊതിച്ചു
നിന്‍റെ കരള്‍ കീറിയോഴുകുന്നു
പാട്ടിന്‍ നദി .. " soembody hear my soul now ..."

ഇരമ്ബുന്നായിരങ്ങള്‍
നിന്‍ ജാലക വാതില്‍ക്കല്‍,

നിന്നു നീ സ്വവര്‍ഗാനുരാഗിയായ്,
കാമോന്‍മത്തനായ്‌ പേര് ചാര്‍ത്തപ്പെട്ടു
അഭിനവ പീലതോസിന്‍ മുറികളില്‍.

നാണം വിതച്ചു നീയെന്നച്ച്ചന്‍;
ഇരുള്‍മൂടിയ മുറികള്‍ നീ
ചുരുണ്ട് കൂടും ബാല്യം.

ലോകത്തിന്‍ മുറിവുണക്കാന്‍
"നിന്‍ വിശ്വാസം എനിക്ക് തരൂ"
പാടി നീ,

നുണ പറയാത്ത സ്നേഹമെവിടെന്നു നീ !

പ്രിയ മൈക്കേല്‍ ,
പറയൂ സ്നേഹമായിരുന്നോ നിന്‍റെ ദാരിദ്രം ?

വേഗം

വേഗം അറുപതെ പാടൂ
കെട്ടിടങ്ങള്‍ക്ക് പൊക്കം മൂന്നേ പാടൂ
എന്നു ബാലിദിയ
വിശ്വാസത്തിന്റെ നൌകയില്‍ കെട്ടാന്‍
എന്‍റെ ജീവിതം ഈ അറബി വീട്ടില്‍ ,
കടത്തിണ്ണയില്‍,
കടല്‍ തിരയില്‍
ഉപേക്ഷിക്കുന്നു ഞാന്‍

മെര്‍മൈട് !!

നീല ജലത്തിന് മുകളില്‍
അവള്‍ വന്നു,
നൌകയില്‍
കയ്യൂന്നി ഉടല്പകുതി
ജലത്തില്‍ തുഴഞ്ഞു
നിന്‍റെ കണ്ണിലേക്കു നോക്കി
ഈറനാവാത്ത
ചുവന്ന കണ്ണുകള്‍
നിന്‍റെ ഒരിറ്റു കണ്ണീരിനാല്‍
അമരത്വം കൊതിച്ചു
വന്നവരാണിവര്‍;നരര്‍
പിന്നീടു ,
ഒര് ചില്ലുകൂട്ടിട്ല്‍ തളച്ചു ,
അവര്‍ നിന്നേ ചുമന്നു
ജലപാതത്തിന്റെ താഴ്വരയിലേക്ക്
വിശുദ്ധ കാസകള്‍ തേടി.
നിന്‍റെ കാമുകന്റെ ചങ്കില്‍
ഒര് കത്തിയാഴ്തി നിന്ന്നെ
കരയാന്‍ കൊതിപ്പിച്ചു
ഒരിറ്റു കണ്ണീര്‍
അതിനാല്‍
അമരത്വം കൊതിച്ചു
വന്നവരാണിവര്‍;വേടര്‍
കണ്ണീര്‍ജലം കൊണ്ട്
നേട്ടമില്ലാത്ത കാലം
മരണം ഒര് പോയ്ക്കലുമായി
നിന്‍റെ നെഞ്ഞിലേക്ക്!
അമരത്വത്തിന്റെ കൊതി പൂണ്ട നിന്നേ
നരകവാതില്‍ തുറന്നു വന്ന
കൊടുംകാറ്റു വേണ്നീരാക്കി കളഞ്ഞു
കേവലം ഒര് പിടി ചാരം.
കാമുകനെയും കൊണ്ട്
പ്രേമത്തിന്റെ ആഴങ്ങളി ലേക്ക്
അവള്‍ ഊളിയിട്ടു !
സെറീന
മത്സ്യകന്യക

കടപ്പാട് :( English Movie Pirates_of_the_caribbean_on_stranger_tides)

ഞാന്‍ !

ഞാന്‍ !
ഒരു കുമിളയില്‍ പൊതിഞ്ഞു
വെറും കാട്ടിക്കൂട്ടലുകളുടെ
ചുനപരത്തി
സത്യങ്ങളെല്ലാം ഒളിപ്പിച്ചു വച്ച്
പുറം പൂച്ചു കാട്ടി
വെറുതെ ചിരിച്ചെന്നു വരുത്തി
സൌഹൃദം നടിച്ചു
കാലുവാരി
ചെളിവാരിയെരിഞ്ഞു
വിദ്വേഷം വമിപ്പിച്ചു
എന്തിനു വേണ്ടി
ഇങ്ങനെ ജീവിക്കുന്നു ?

വിഷമാന്തരം !

വിശന്നപ്പോള്‍
റേഷനരിയുടെ
പുഴുക്കുത്തിലായിരുന്നു
എന്‍റെ കണ്ണ്

അച്ഛന്റെ മാരുതിയില്‍ നീ
സ്കൂളിലിറങ്ങുമ്പോള്‍
ഒറ്റക്കാലില്‍ മുടന്തിഞാന്‍
വള്ളിപൊട്ടിയ ഒറ്റ ചെരിപ്പില്‍.

ഒരു സൈക്കിള്‍,
വെള്ളം ചീറ്റുന്ന
ഒരു കളി തോക്ക്,
കുറച്ചു നാരങ്ങ മിട്ടായി
സ്വപ്നംകണ്ടു ഞാനുറങ്ങി.

ഉച്ചക്കഞ്ഞി;
പൊടിയുന്നു
പല്ലിടയില്‍
പയറിലെ കല്ല്‌
എടുത്തു സൂക്ഷിച്ചു സഞ്ചിയില്‍ ;
കൊത്തങ്ങല്ലാടാം !

കണ്ണിനു മുന്നില്‍
വിഷു നിലാവ്
എനിക്ക് പൊട്ടിയ സ്ലേറ്റും
കുറച്ചു മഷിതണ്ടും
കൈനീട്ടം.

മുട്ടുപൊട്ടിയ വേദനയില്‍
മുഖം കുനിച്ചിരിക്കെ
നീ പറഞ്ഞു ,
കൂട്ടുകാര
നിന്‍റെ മുറിവിനു
ഒരു നുള്ള് മഞ്ഞള്‍ പൊടി,
വേണ്ട, കമ്മുണിസ്റ്റു പച്ചയാകാം.
അവന്‍റെ മുറിവിലെ ബാണ്ടൈടിന്റെ
പടം ഞാന്‍ വരച്ചു നോക്കി .
പച്ചയല്ലേ
മുറിവ് വേഗമുണങ്ങി ,
മൂട് കീറിയ വള്ളിനിക്കര്‍
ഒറ്റകൈയാല്‍ പിടിച്ചു എന്‍റെ ബാല്യം
ഒന്തം കയറി !

നീയാര്?

നീയാര്?
താരക രഹിതമാം നിശ
ഒരു പെന്റുലതിന്‍
ഭീതശബ്ദം മുക്രയിടും മുറി
ഒരു മെഴുകുതിരികാലിന്റെ
വെട്ടം പാറി വീണു
നിഴല്‍ മുറിയുന്ന ചുമര്‍
നിശീഥത്തിലെ മഞ്ഞുടഞ്ഞു
എനിക്കുചുറ്റും തണുപ്പിന്റെ
നക്തഞ്ചര നഖരം
ഉടലില്‍ തണുപ്പ് പുതച്ചു
മുറിയില്‍ നിന്നിറങ്ങുന്ന ഞാന്‍
നിന്റെ തുറമുഖത്തേക്ക് വരുന്നു
നീയാര്?
കടലിലോഴുകുന്നോറ്റയ്ക്ക്
യാനപാത്രം
കണ്ണുപൂട്ടിയിരിക്കും നാവികന്‍
ചുംബിച്ചു ജീവനൊടുക്കും
ഹിമപാളിയെ !
ദൈവമെയെന്നു
പ്രധിധ്വനിക്കും നിലവിളി
വിളിയിലവിടെ പിടയും
നിന്റെ പ്രാണന്‍ .
ഇന്ന് നാം
ഇതുറമുഖത്തിന്‍
രണ്ടറ്റങ്ങളില്‍
നിദ്രാവിഹീനര്‍,
ആകുലര്‍
നമുക്കൊരേ മതം,
ഒരേ ദൈവം
അകലങ്ങളില്‍ ഇരുന്നു
നാമറിയും പ്രാണനില്‍
സ്നേഹം കുറുകുന്നത്
നീയാണ്
കശേരുക്കളില്‍
ജ്വലനദീപ്തിയായും
ജടരാമ്ലമായും,
നിദ്രാവീണയായും
നീയാണ്
നീയേയമൂല്യ വൈഖരി
നീയേയനാക്രാന്ത നിര്‍വൃതി!

തക്ഷകന്‍

കരിമൂര്‍ഖനെ
അടച്ച കുടത്തില്‍
താഴ്ത്തിയ
കയ്യിലിറ്റുന്നു
ദന്ത ക്ഷതങ്ങളില്‍
നിന്ന് ചോര!
നിണത്താലിന്നു
വരക്കണം
ചുവരിലൊരു ചിത്രം.
ചിത്രം കഴിയുംബോഴെക്കും
നീലിച്ച കൈ തളരും , സാരമില്ല

ചിത്രത്തിനൊരടിക്കുറിപ്പ് വേണം,
മത്സരതിനയക്കുമ്പോള്‍ മാര്‍ക്ക്‌
ഒട്ടും കുറയരുത്‌
അടിക്കുറിപ്പ് തേടുന്നു ഞാന്‍,
വാക്കിന്‍ നാനാര്‍ഥങ്ങള്‍
സന്ധികള്‍
സമാസങ്ങള്‍...
വാക്കുകള്‍ക്കിടയില്‍ വായിക്കുമ്പോള്‍
ബലിമൃഗ യൂപങ്ങള്‍
ഒരു മുനിയറ
കാലം വിശപ്പിന്റെ
പഴുതടച്ച
ഒരു പിടി എരുക്ക്
കുപ്പിച്ചില്ല് ,
കുറച്ചു കരച്ചില്‍,
ഒരെച്ചില്‍ ഇല
കരിപിടിച്ച ക്ലാവ് വിളക്ക്..
പട്ടിക നീളവേ
കണ്ണില്‍ തടഞ്ഞു
തക്ഷകന്റെ പല്ല്!
വിഷം പോയ ഒന്ന്,
പണ്ട് രാജാവിനെ കൊന്നത് !
മതി ഇത് മതി , ഈ ചോരചിത്രത്തിനു
ഞാന്‍ പേരിടും
തക്ഷകന്‍

യോല

യോല,
ഒരപൂര്‍വ ചടുലത
ഒരു സുന്ദര കാവ്യം!

മഞ്ഞുപോലെ കന്തൂറകള്‍
വെള്ളിയും സ്വര്‍ണവും കെട്ടി
ഘട്ഗങ്ങള്‍
ഉയര്‍ത്തി എറിഞ്ഞു
എത്ര ലാഘവത്തോടെ
അവരത് പിടിക്കുന്നു
ഒരു ബൂമരാന്‍ഗ് പോലെ.

നിങ്ങള്‍ വട്ടത്തില്‍
ചൂരല്‍ വടികള്‍ കറക്കി
നെഞ്ചിലേക്ക് വീഴുന്ന
ഈ വാളുകള്‍ പിടിച്ചു
അറബി സംഗീതത്തിന്റെ
മാസ്മരം.

ഒരു നിമിഷം ഞാന്‍
എന്നെ മറന്നു
കൂട്ടുകാരാ ,
അറബി സുഹൃത്തേ
നീ എന്നെ കൈക്ക് പിടിച്ചു,
ജബല്‍ ഹഫീതിനു മുകളില്‍
ഈ എമിറാതി നൃത്തക്കാരുടെ
ഇടയില്‍ നിര്‍ത്തിയപ്പോള്‍
പിന്നെ ഞാനും നിങ്ങള്‍ക്കൊപ്പം
വലത്തു വച്ചു !

നിന്‍റെ ജ്വരം എന്നിലേക്ക്‌ സംക്രമിച്ചത്

ഇന്ന് തടാകക്കരയിലിരുന്നു

തിരയുകയാണ് ഞാന്‍

നിന്റെ സ്വരം

ഹൃദയത്തിന്റെ ചായയുള്ള തടാകം

പുറകില്‍ ഓടി മാഞ്ഞു

ഒരു നിഴല്‍

പ്രഭാതം

വയനാട്

അമ്പുകുത്തി മലയുടെ

മുകളില്‍ കണ്ട നിഴല്‍

എന്നിലേക്ക്‌ നിന്റെ

നീല ഞരമ്പുകളെ

കൊണ്ടുവരുന്നു

നാം രണ്ടുപേരും

കൈകൊര്ത്തിരുന്നു

കണ്നീരുപ്പുകൊണ്ട്

നാം പടുത്ത മലയില്‍

മഞ്ഞു കൊള്ളാതിരിക്കാന്‍

കാശ്മീരി ഷാള്‍ പുതപ്പിച്ചു

നീയെന്നെ .

മറ്റൊരു സായാഹ്നം

ബംഗാളൂരില്‍

നിന്റെ നെറ്റിയില്‍

കൈവച്ച എന്റെ വിരല്‍ പൊള്ളി

ഒലിക്കുന്നു നിന്റെ ജ്വരം

പനിയുടെ മൂര്ചയില്‍

ഞാന്‍ നിന്നെ താങ്ങി

പിന്നെ നിന്റെ നെറ്റിചൂട്

എന്നിലേക്ക്‌ സംക്രമിച്ചു

പതുക്കെ

നമ്മള്‍ ഒരുമിച്ചു

വില പറഞ്ഞ ആനക്കൊമ്പ് പ്രതിമ

ആ വണിക്ക് വിലപേശി

വിറ്റത് ഓര്തെടുതുകൊണ്ട്

നീയെന്റെ തല യിണ കള്‍ക്കുള്ളില്‍

മുഖം പൊത്തി ക്കിടന്നു

നാം ഒളിച്ചു കളിക്കുകയായിരുന്നു.

പിന്നെ

ഒരു കുഞ്ഞു താരാട്ട് പോലെ നിന്റെ

സംഗീതം ഒഴുകിപ്പരന്നു

"കമല ജാതള വിമല സുനയന ......

എന്തോരൂഷ്മളത

പനിക്കുന്ന നിന്റെ വരികള്‍

എപ്പോഴാണ് ഞാന്‍

ഉറങ്ങിയത്

ഉണരുമ്പോള്‍ നമ്മള്‍

നാട്ടിലാണ്

പനി വിട്ടിരുന്നു.

പിന്നെ

തൃശൂര്‍ ജില്ലാസ്പത്രിയിലെ

മുഖത്ത് കടന്നല്‍ കലയുള്ള

നേഴ്സ് പറഞ്ഞു

കഞ്ഞിയും ച്ചുട്ടപപ്പടവും

വാങ്ങി വരാന്‍ ആളെ അയയ്ക്കു

താങ്കള്‍ക്ക് 103 ഡിഗ്രി പനിയായിരുന്നു

ഇന്നലെ

ബോധമില്ലാതെ

ആരോ ഇവിടെ കൊണ്ടുവരുമ്പോള്‍ !

മോക്ഷം

കറുത്ത ലോഹയിട്ട

പാതിരിയെ

തൂക്കിക്കൊന്നു.

ഒരു തോക്കിന്കുഴലില്‍

കുട്ടികള്‍ നിര്‍ദാക്ഷിണ്യം

നടന്നു തളര്‍ന്നു.

കണ്ണ് പൊത്തിക്കളിക്കാന്‍

പോയ അവരെ

മുതലക്കുളത്തില്‍

എറിഞ്ഞു കൊന്നു.

പ്രജ്ഞ കെട്ട കമിതാക്കള്‍

പ്രണയ തുരുത്തില്‍ നിന്ന്

ചാടി മൃതിവരം വാങ്ങി

മതികെട്ടവര്‍

മതിലികള്‍ക്കുള്ളില്‍

കല്ലായി നിന്നുകൊടുത്തു

പുണ്യം പെറാന്‍!

എന്നിട്ടും ബാക്കിയായവര്‍,

മരുഭൂമിയിലൂടെ

മണലിനു കുറുകെഓടി;

ഇത്തിരി തണല്‍ തേടി.

തീരത്ത് പകുതി മുങ്ങിയ

ഒരു വഞ്ചി.

മുനയൊടിഞ്ഞചുണ്ടുമായി

മഴകാത്തു മുഷിഞ്ഞ

വേഴാമ്പല്‍ പറന്നു പോയി.

എനിക്ക് കുറുകെ ചാടിയ

കരിമ്പൂച്ചയുടെ

കറുപ്പിലേക്ക്‌

രാത്രി സംക്രമിക്കുന്നു

നാളെ അതിന്റെ ജാതകം നോക്കണം !

മണല്‍ കവിത

I
മരുഭൂമി

വിശപ്പിനു
ചുടുമണല്‍ തിന്നവന്‍
ചത്തു;
ചോരച്ചര്‍ദ്ദിച്ച്
II
റാസല്‍ ഖൈമ

ഒട്ടകപ്പക്ഷികള്‍
മണലില്‍ ഒളിപ്പിച്ച
മുട്ടകള്‍
വിശപ്പിനു വിറ്റുതിന്നു
കാവല്‍ക്കാരന്‍ ബംഗാളി

III
ഉം അല്‍ നാര്‍

ഒട്ടകങ്ങള്‍ക്കു
കുളമ്പ് ദീനം
മണലിനു ചൂടില്ല പോല്‍
മസരയിലിരുന്നവന്‍
രുചിക്ക്
വാരി കഞ്ഞിയിലിട്ടു
ഒരു പിടി ചുടു മണല്‍

IV
നാട്

നിന്റെ ആദ്യചുംബനം
ഇഷ്ടപ്പെട്ടവന്‍
മണല്‍ വാരിയെറിഞ്ഞു
നിന്‍റെ കല്ലറ മൂടി
പുത്തന്‍ രാഷ്ട്രീയം
വെറുത്ത നീ
കൈയില്‍ ഒരുപിടി മണല്‍ കരുതി
വോട്ടു ചോദിച്ചെത്തിയവര്‍
കണ്ണില്‍ മണലുമായി മടങ്ങി
V
ആഫ്രിക്ക

കാല്‍ച്ചുവട്ടില്‍ നിന്ന്
ഒലിച്ചു പോയ
മണല്‍ തേടി
പതാക താഴ്ത്തിക്കെട്ടി
മണല്‍ മുനമ്പ്‌ ചുറ്റി
വടക്ക് നോക്കിയില്ലാത്ത നാവികന്‍
VI
കടല്‍

മണല്‍ ക്കേറിക്കേറി
മുക്കുവന്റെ കടല്‍ വറ്റി
മണലില്‍ ഉറഞ്ഞുപോയ
കൊതുമ്പുവള്ളത്തിലിരിക്കുന്നു
മൂക്കുത്തിയില്ലാത്ത
മുക്കുവത്തി
VII
കായല്‍

മണലില്‍ കൊണ്ട് മുറിഞ്ഞു
മണല്‍ മാഫിയ മഴു
ഭൂമി മര്‍മം പിളര്‍ന്ന്,
മുനയൊടിഞ്ഞ മഴു
ചുവന്ന മണലായി
VIII
പ്രവാസി വീട്

മണല്ക്കാലത്ത്
തണുപ്പ് പുതക്കാന്‍
എനിക്കൊരു
കംബളം വാങ്ങണം
കണ്ണ് പൂഴ്ത്തി വക്കാന്‍ തരുമോ
കുറച്ചു മണല്‍ വെള്ളം
ദാഹ ശമനത്തിന്
പെട്രോള്‍ കുടിക്കാം
വില ചില ഫില്സ് മാത്രം !!